Harry Potter n'asturllionés (asturnews)

La concesión de les sovenciones pa la edición de llibros da anuncia de les novedaes n'asturianu pa los próximos meses

Les sovenciones amuesen novedaes importantes lo mesmo en llibros que n'editoriales
Redacción.

Harry Potter n'asturianu, una de les novedaes llamatives pa esti añu. Ta acabante d'espublizase la resolución pola que se conceden les sovenciones pa la edición de llibros en llingua asturiana y n'eonaviegu pal añu 2007. Esta resolución da anuncia de la mayor parte de les novedaes editoriales en llingua asturiana pa la segunda metá del 2007 y los primeros meses del 2008. Cerca de 70 novedaes que van dir apaeciendo nos meses vinientes.

La editorial Asturtoons va espublizar esti añu nueves novedaes na so colección ilustrada pa neños d'autores como Miguel Rojo o Enrique Carballeira y Madú Ediciones va editar una 'Guía secreta de la Llaboral' de Dolfu Camilo Díaz y Mercerdes Menéndez, ente otres novedaes.
Mención especial tien Ediciones Trabe, la editorial que más llibros espubliza cada añu y qu'edita tolos xéneros. Destaca la continuidá de la so colección 'Albera' de poesía, con nuevos númberos, la edición del primer llibru de monólogu modernu con autores como Benxa Pérez, Chechu García o Inaciu Galán o tornes como 'El médicu a palos' de Moliére y la edición, bien novedosa na lliteratura asturiana, de la torna d'una obra d'ésitu internacional como ye 'Harry Potter y la piedra filosofal' de J.K. Rowling, la primer entrega de les aventures del xoven magu inglés.
Nel casu de los ensayos, destaca la bayurosa producción d'esti añu, con obres como 'Mitos y lleendes del conceyu de Xixón' d'Alberto Álvarez Peña, editáu por VTP, 'Otres xeneraciones y dexeneraciones (sieglu XX y lo que va de XXI) d'Antón García, 'El nacimientu d'una nación. Historia de Sudáfrica' de Faustino Zapico d'Araz Llibros o 'El conceptu xeneracional (Actes de la Xunta d'Escritores n'Uviéu), coordináu por Xaviel Vilareyo y editáu por Trabe.

La edición pa neños y adolescentes va ufiertar, como cada añu, una bayurosa producción de tou tipu, con obres de Maite G. Iglesias, Vicente García Oliva, Berta Piñán y Sabel Tuñón y Lourdes Álvarez, que vuelven a espublizar ún de los sos llibros pa neños de cero a trés años, nesti casu 'Animalaes'.

Ente les resoluciones apaecen dalgunes editoriales nueves como Suburbia Ediciones, dedicada a la lliteratura fantástica y a los xenéros menos habituales o Araz Llibros, dedicada al ensayu. Dambes dos van presentar esti mes de setiembre les sos primeres publicaciones n'Arribada de Xixón. Llibros como 'Llingua estandar y normalización. La estandarización de les llingües subordinaes' de David Guardado d'Araz Llibros o 'Vía de Serviciu', antoloxía cola obra de los autores más mozos de Suburbia Ediciones. Otros autores con llibros nuevos pa estos meses van ser Xuan Bello, el debutante Nicolás V. Bardio, Esther García, Neto, Ismael Arias, Naciu Varillas o Beatriz R. Viado ente otros.