viernes, 20 de febrero de 2009

El PSOE denuncia que la Junta nun tien política pa la protección, usu y promoción del llionés.

El pasáu 12 de diciembre, el portavoz de Cultura y Turismu del grupu parlamentariu socialista nas Cortes de Castilla y Llión, el procurador por Zamora José Ignacio Martín Benito, presentóu una pregunta na que se pidían espricaciones sobre las mididas tomadas pola Xunta pa la protección del llionés.

Na respuesta de la Conseyera de Cultura -firmada'l 16 de febreiru- solo se fai referencia a las dúes xornadas organizadas pol Instituto Castellano y Leonés de la Lengua na Universidá de Llión, los años 2006 y 2008, y a la participación del Muséu Etnográficu de Castilla y Llión na financiación parcial del proyectu audiovisual "Asina falamos".

Pa Martín Benito, el balance ye mui probe y deixa ver "la falta d'una programación sistemática y d'unos obxetivos concretos”. Na súa opinión "nun s'está llevando a cabu una programación de protección, usu y promoción del llionés", tal como se recueye nel Estatutu. Outramiente, señala que'l feichu de que nun haya contestación pola Conseyería d'Educación muestra que "nun s'está faciendo nada dende l'ámbitu educativu, nin siquiera entróu nos planes de la Conseyería d'Educación, nin existe tampouco coordinación entre dambas conseyerías”.


El procurador socialista zamoranu cueida que la Xunta ha decidise a cumprir l'artículu 5.2. de la norma estatutaria y regular la protección, usu y promoción del llionés."Pa ello, ye precisu diseñar un programa ampliu d'actividades: d' investigación y divulgación, educativas y formativas, expositivas y lúdicas en tornu al llionés, con un compromisu firme y constante por parte de l'alministración autonómica conforme al espíritu del Estatutu",señala Martín Benito.

No hay comentarios: