Termina’l Cursu d’encuestadores de Toponimia y Dialectoloxía d’El Teixu

Despuéis de dous fines de sumana de trabayos, acabóu’l I Cursu d’encuestadores de Toponimia y Dialectoloxía en Zamora, organizáu pola asociación "El Teixu, Rede pal Estudiu y Defensa de la Llingua Asturllionesa".

Los trabayos y entrevistas feitos na provincia valionen pa sacar informaciones muito interesantes sobre la conservación de la llengua asturllionesa y sobre los nomes tradicionales de los puebros na provincia de Zamora. Los organizadores quedonen muito contentos con la participación nel cursu y por eso piensan repetirlu con ediciones de más duración y temática más variada.

L’asociación "El Teixu, Rede pal Estudiu y Defensa de la Llingua Asturllionesa" pretende con esti cursu primeiru, puestu por especialistas na materia, la formación de presonas interesadas na recoyida de material llingüísticu y toponímicu en Zamora, de maneira que se consiga una imaxen más fiel de la realidá llingüística d’esta provincia. Pa outras ocasiones, por mor del ésitu consiguíu, la iniciativa vai llevarse a outras partes del ámbitu llingüísticu asturllionés, mayormente p’aqueillas onde’l conocimientu de la situación llingüística ye más escasu.

Las crases teóricas, que tuvionen una duración de 10 horas, fonen los días 19 y 20 de setiembre en Zamora capital y incluyonen conocimientos elementales de dialectoloxía asturllionesa y formación básica pa diseñar la investigación de campu y dominar los procedimientos d’obtención de datos. Por outru llau, las 20 horas de prácticas feciónense los días 3 y 4 d’outubre y consistionen na realización d’entrevistas y l’aplicación de cuestionarios en distintos llugares del noroeste de la provincia, concretamente nas comarcas de Senabria, La Carbayeda, El Valle Vidriales y Aliste. La gran cantidá de material recoyido llevóu a que’l llabor posterior d’organización de datos s’allargara varios días más.

Amás de valer pa enseñarse los alumnos del cursu, las entrevistas permitionen medrar considerablemente’l conocimientu del que se dispón sobre la conservación de la llengua asturllionesa nas comarcas mentadas, y tamién p’arrecadar muito material toponímicu de caraute popular. Todo esti material val pa conocer meyor la realidá del asturllionés na provincia de Zamora, que, onque con dificultá, inda se mantién muito fiel nas comarcas más occidentales.

“El Teixu, Rede pal Estudiu y Defensa de la Llingua Asturllionesa”, ye una asociación cultural que trabaya na conservación del padremuñu llingüísticu y la defensa de la llengua asturllionesa, manteniendo en todu momentu una visión unitaria del dominiu llingüísticu. El sou llabor quier poner de relieve y defender la esistencia d’esta llengua que comparten los territorios d’Asturies, Llión, Zamora y Miranda del Douru.