miércoles, 28 de noviembre de 2007


I Certame de Rellatos Curtios La Caleya 2007

Los Estatutos de l’Asociación Cultural La Caleya establecen que los fines de la mesma son la promoción de tódolos rasgos de la cultura propia de Llión incluyendo cumo un aspectu principal d’ella la Llingua Llionesa.

La Constitución Española no sou Artículu 3u, referíu a tódalas llinguas ou idiomas d’España, diz que «La riqueza de las distintas modalidaes llingüísticas d’España ye un padremuñu cultural que será oxetu d’especial respetu y protección».

El nuevu Estatutu d’Autonomía de Castiella y Llión diz no sou artículu 5.2 que «el Llionés será oxetu de protección específica por parte de las instituciones pol sou particular valor dientro del padremuñu llingüísticu de la Comunidá. La súa protección, usu y promoción será oxetu de regulación».
Cumo una humilde y cenciella pero necesaria y imperativa contribución a esti llabor, l’Asociación Cultural La Caleya convoca esti CERTAME DE RELLATOS CURTiOS, acordias conas siguientes:


BASES
1. Pueden participar tódolos ciudadanos de la Unión Europea qu’asina quieran con un máximu de dúas obras por autor.


2. Los rellatos han de tar escritos en Llionés; almítense los trabayos escritos en cualquiera de las variedaes dialectales del dominiu llingüísticu asturllionés.


3. El tema, nesta primer convocatoria, ye llibre y la obra ha de ser orixinal, inédita y non galardonada anteriormente en nengún concursu lliterariu nin con outru premiu o distinción.


4. El xéneru ye la Narrativa (rellatu, cuentu, prosa poética, memoria, carta, diariu, etc.)


5. La extensión máxima de los rellatos será de 10 páxinas.


6. La presentación tien que s’axustar a las normas vinientes:
a. Cuatro copias en formato DIN A4 escritas a ordenador, en lletra Times New Roman 12, interlliniáu a doble espaciu y impresas por una sola cara.
b. Las páxinas debidamente numeradas y grampadas.
c. Na portada consignaráse, únicamente: RELLATOS CURTIOS LA CALEYA 2007, el títulu del rellatu y el pseudónimu del autor.
d. Nun sobre zarráu identificáu cono seudónimu y títulu del rellatu, incluiráse una ficha conos datos del participante, (nome y apellidos, señas completas, corréu electrónicu y teléfonu de contactu) y una fotocopia del DNI.
7. El plazu de presentación acaba’l 31 de xeneiru de 2008 y los trabayos tienen que s’unviar a:


I Certame de Rellatos Curtios La Caleya
Apartado de Correos 187
24700 Astorga (Llión)


Considéranse recibíos dientro de plazu los trabayos que lleven no matasellos postal una data non posterior a l’amentada. Nun s’almiten trabayos unviaos por corréu electrónicu.


8. El Xuráu vai formase por destacadas personas del ámbitu de la cultura. La composición del mesmu vai dase a conocer oportunamente y ye competente pa decidir sobre cuestiones relativas a esti Certame y que nun figuren espresamente nestas Bases. El secretariu de La Caleya actúa cumo secretariu del Xuráu con voz y sin votu.


9. El fallu del Xuráu vai dase a conocer el mesmu día de la entrega de premios, n’actu públicu. Los premiaos habrán de presentase a recoyelos no momentu d’entrega de los mesmos o delegar nuna segunda persona. No casu de nun se presentar perderán cualquier dereitu al premiu.


10. Los participantes eximen a La Caleya de cualquier responsabilidá derivada del plaxu o cualquier otra tresgresión de la lexislación vixente na que pudieran incurrir los participantes.


11. La Caleya resérvase por cuatro años el dereitu n'esclusiva de la edición de los trabayos premiaos, al igual que los beneficios que puedan siguise arréu. De los exemplares publicaos, entregaránse 5 a cadún de los sous autores.


12. El xuráu resérvase la facultá de declarar los premios ermos en casu de considerar que la calidá de los trabayos nun chega al mínimu esixible.

13. Establécense los siguientes premios:
Primer premiu: 300 € y diploma.
Segundu premiu: 200 € y diploma.
Tercer premiu: 100 € y diploma.
Cuartu premiu: Diploma.

14. La presentación al Certame implica l’aceptación de las bases. Cualquier circunstancia non prevista nas mesmas resolveráse de forma inapelable por parte del xuráu.

2 comentarios:

Trabiella dijo...

Hai tiempu que nun habié noticias de La Caleya y agora con esta edición nueva d'un concursu vieyu van retomar la sua actividad. Norabona pola niciativa y que seya la punta de llanza d'un bayurosu periodo d'actividá pola nuesa llengua

La Caleya dijo...

El próximu sábadu día 29 se celebrará nel auditoriu del Conservatoriu "Angel Barja" d'Astorga la proclamación de ganadores y entrega de premios del I Certame de Rellatos Curtios "La Caleya 2007".
Será a las 20 h.
Mas información en http://www.lacaleya.org