sábado, 8 de agosto de 2020

Músicas da Raya

Músicas da Raya


El proyectu Músicas da Raya, formáu pol mirandés Paulo Meirinhos y el zamoranu Luis Antonio Pedraza, viaxará a Bruselas pal prósimu mes d'outubre, con motivu del treinta aniversariu de los Fondos Interreg. La capital europea acoyerá conciertos y actuaciones de grupos que representan el mestizaxe cultural européu, entre los que sonará la música de los nuesos paisanos.


Músicas da Raya naz de la buena xeira entre esta pareya de músicos, que comparten l’oxetivu de fomentar el repertoriu transfronterizu de las comarcas zamoranas y trasmontanas. Siempre fieles a la tradición, estos músicos multi-instrumentistas vienen faciendo un apueste por renovar el repertoriu dende’l respetu y conocimientu de la cultura heredada de los nuesos antepasaos. 


Destacamos tamién que Pedraza sacóu a la lluz hai unos meses el sou últimu discu, Fierro. Con esti títulu, l’outor fai referencia al noroeste zamoranu, onde ontavía se puede sentir esta pallabra del tueru asturllionés. El zamoranu ofrez composiciones propias que s’asientan sobre los llizaces del folclor y las tradiciones de la nuesa tierra. Pedraza ye tamién miembru del grupu madrileñu “La musgaña” y colabora habitualmente con muitos folcoristas de distintos llugares de la península. 


D'outra manu, Paulo Meirinhos ye un reconocíu folclorista, non solo na Tierra de Miranda, sinon tamién fuera d’ella. Amás d’intérprete, desarrolla un importante llabor cumo luthier, fabricando los sous instrumentos dafeitu. Impulsor del festival L burro i l gueiteiro, declárase defensor del mirandés, que fala nos sous conciertos. Recordamos qu'el mirandés ye una variante asturllionesa falada na Tierra de Miranda, y hermana de las falas zamoranas cumo’l senabrés y l’alistanu.




No hay comentarios: