jueves, 14 de abril de 2011

Roberto González-Quevedo publica «Onde viven los amigos»

(Noticia del semanariu http://www.lesnoticies.com/)

L'outor de Palacios del Sil, Roberto González-Quevedo, vuelve a las llibrerías con Onde viven los amigos, un llibru de rellatos escritu n'asturllionés occidental y editáu por Publicaciones Ámbitu que sigue en tonu y emoción la llinia abierta pola súa anterior publicación, El Sil que baxaba de la nieve. Esta obra contién tres rellatos que coinciden con la infancia, la mocedá y la madurez, y onde se conxugan la fantasía, la sicoloxía, el territoriu y el mundu llíricu que pal outor ñaz na súa tierra natal: Palacios del Sil.

Roberto González-Quevedo, amás de muitos títulos de caraccter antropolóxicu, filosóficu o filolóxicu, tien publicadas dalgunas de las principales obras narrativas y poéticas de la Primeira Promoción del Surdimientu. En 1981 conseguióu’l Premiu de Narraciones Curties de la Diputación d'Asturies –antecesor del Xosefa Xovellanos– con el sou rellatu: Pul sendeiru la nueite. L'escritor ye miembru de númeru de l'Academia de la Llingua y ocupa huguaño'l cargu de secretariu, amás de ser director de la revista Cultures, editada pola Academia y dedicada a temas antropolóxicos y etnográficos.

No hay comentarios: